لم تنشر الشراع طيلة فترة الانتخابات البلدية والاختيارية اي بيان لأي مرشح او مرشحة او لائحة في كل لبنان … لكننا بعد ان قرأنا بيان المرشحة المعروفة رلى حوري ابنة الطريق الجديدة والعائلة الكريمة ، وجدنا ان نشر بيانها فائدة لصدقه وعفويته
بيان ترشيح رلى حوري
اعزائي
ترشحت للانتخابات البلدية في بيروت، سأخوضها مستقلة منفردة ، لانني لم اجد لائحة تعبر عن رؤيتي و او تقبل شروطي للانضمام لها .. سيكون من البنود الاساسية لبرنامجي وضع خطة خاصة للاهتمام ورعاية حيوانات الشوارع وايوائها ( بصراحة الحيوانات فيها خير اكتر من البشر واكبر دليل ان الناس تنتخب دائما ذات البوطة وتغرقنا معها بالفساد وتكرر فعلتها مع كل دورة انتخابية .الحمار كان تعلم ما تواخذوني ..صح او انا غلطانة..؟؟!!!
المتفلسفين على هذه النقطة ما تسمعوني صوتكم انتم اصل البلاء ) !!
فضلا، عن الاهمية القصوى والعاجلة بالنسبة لي” محاربة الفساد بأشكالة ” وايجاد بيئة آمنة ومستقرة لاهلنا في بيروت و متابعة موضوع الحق في الانتفاع وتامين الخدمات للمواطنين وليس شحد الحقوق حسب الواسطة !!
اعادة الاعتبار لبلدية بيروت ومكانتها ” المخلخلة” بالنسبة لاهل بيروت !! فلماذا تم مسح البيارتة منها !!؟؟
ازالة جميع التعديات عن الاملاك العامة ..خصوصا، في الطريق الجديدة التي اصبحت امتدادا لسوق صبرا وشاتيلا والرحاب وهذا غير مقبول نهائيا .
المساواة بالتعامل بين جميع المواطنين ..مش دكانة ومحسوبيات .. !!
بلدية بيروت مهترئة …يجب العمل على انهاضها اداريا ويكون العاملين فيها من اهل بيروت ( اهل مكة ادرى بشعابها ) كغيرها من البلديات التي توظف من اهل منطقتها حصرا .. ووقف الهدر المالي ..!!! استحداث مشاريع خدماتية وانتاجية تدر مدخول على البلدية لتخفيف الرسوم على المواطنين .. وترميم ما هلك من خدمات أو تطويرها لتامين الراحة لاهلنا في بيروت .
العمل على اشراك المواطنين واعلامهم فيما يدور في دهاليز البلدية … لنتشارك جميعا في تصويب العمل و اعادة احياء دورها البلدي .
وهلا حإحكي باللغة العامية .. بتمنى القراءة للأخير.. اعزائي ،
انا ما كنت بالوارد ابدا الترشح للانتخابات البلدية …لكتير اسباب …منها : مني جاهزة نفسيا بسبب الاوضاع المقلوبة والفساد وغياب الاخلاق والضمير ..وكمان غياب الناس يلي هني الاساس بدعم المرشحين .. الناس اغلبها صار حقها كرتونة اعاشة .. وبتنتخب الفاسد .. والبلدية من كل عمرها ادارة سيئة ومحسوبيات ووسايط وصفقات ووساخة وهدر مال عام …هيدا المال يلي هوي من جيوبنا ومن قلوبنا ومن صحتنا . !!!
كمان من الاسباب غير جاهزة ماليا .. وغير جاهزة صحيا بمعنى بدها ركض .. والانتخابات السابقة كلها ركضت فيها اخر شي كلو مصاري وصفقات وتزوير نتائج .. !!
كمان من الاسباب .. انو عضو مجلس بلدي ما الو معاش شغلة ببلاش يعني تقديم وقت مجاني عمل تطوعي ليلي بدو يشتغل بضمير ..!!! ما عم احكي على يلي نيتو يوصل للسرقة .. يعني بدها ركض وتعب …هون بدك الناس تقدر هالشي ..المشكلة صار يلي هدفو يصلح بضمير متلو متل يلي فايت للتجارة والصفقات .. يعني ناس على حساب ناس ..!!!! لكن ليه في كتير بيدفعو ملايين ليوصلو ؟؟ خبروني !!!!! والناس ما عم تفكر الا بحق الصوت للأسف!!
انا ما بحاجة لا بريستيج ولا للناس تعرفني …ولا هدفي صفقات كما درجت العادة بالبلدية .. يعني ما في شي حيضيف عليي اذا وصلت او حاخسرو اذا ما وصلت ..
عيلتي معروفة واسمي معروف وعندي اكتفاء وقناعة بالحياة . بمعنى اذا نجحت منها بالنسبة الي طبخة .. بالعكس تماما هي ركض ووقت وجهد وحرب لانماء بيروت واستعادة اهل بيروت دورهم .. و لتحقيق مصالح اهلنا في بيروت وتحسين القوانين والغاء بعضها المجحفة بحق اهلنا ببيروت .. .. وطبعا ، مصلحة الحيوانات الشاردة التي كانت دائما همي لمراعاتها ورعايتها وايوائها ..
لما عم اطلع على بعض الاسماء ما لقيت الا تكرار لذات البوطة وذات الاحزاب …يعني بعدنا بذات الدوامة ..
قبل اخذ قرار الترشح عرضت على احد الاصدقاء الذي اؤمن باخلاقياته ونزاهته الترشح.. رفض .. وكنت ارغب في ان يكون هو .. واعتبر انه يمثلني … ولكن ، لما شفت انو الاوضاع هي ذاتها .. قررت اترشح وكتير متاخرة .. لربما الناس فاقت ..لربما !!!
كمان صديقنا المختار سليم مدهون سيترشح بلدية ..وكتير محترم .. واخوه توفيق سيترشح مكانه على المختره عن منطقة المزرعة ..وانا اتمنى ان يوصلو تنيناتهم نحنا مع الاوادم .
بكل انتخابات كتير ناس بتقول نحنا حننتخبك مثلا.. بيطلع اخر شي كتير منهم منافقين لا راحو ولا اجو ولا انتخبو .. قلمهم صوت واحد مافي الي .. بمعنى ما حدا يبيع كلام ..عيب ..
انا ما فارقة معي شي .. اذا بتحبو تساعدو انو اوصل للبلدية اغلبكم بيعرف شو ممكن اعمل .. بيكون كتير منيح .. واذا ما تساعدت من الاوادم حيبقو الفاسدين وكرمالك يا عليلة يا بلدية لورا .. !!!
اذا فعلا مآمنين بوصولي للعمل الجدي والنزيه والصارم .. اتمنى ان نكون يدا واحدة ..واتمنى من حضراتكم مشاركة منشوراتي لاعلام الناس بترشحي .. والتواصل مع اصدقاءكم. انا ما عندي مكنة انتخابية ولا مال ..ولا مال انتخابي .. اذا معي ليرتين بفضل طعمي فيهم حيوانات الشوارع واشتريلهم دواهم .. على الاقل بساعد حيوانات ضعيفة بحاجتي .. وفي كل كبد رطبة اجر .
والله زهقنا من تحالفات حزبية وغيرها وقرفنا ..وشفنا دائما بكل الدورات الانتخابية شو عملو بالبلدية وشو قدمو لاهل بيروت … زبالة ..مافي كهرباء ..مافي مي .. التعدي على الاملاك العامة .. اختفاء الارصفة واستبدلت بمحلات …الناس والاطفال مجبورة تمشي بين السيارات لان الارصفة محتلة والفساد عامم ..لعن الله كل فاسد .. هيدا غير أن البلدية بذاتها لازم تكون من اهل بيروت !!
شوفولي بالمناطق المسيحية ..شوفولي الاشرفية ..النضافة الترتيب ما بدنا نتخبا ورا اصبعنا .. وقارنو بطريق الجديدة يلي صارت مرتع للزعران والزبالة و مافي رصيف نمشي عليه ..ليه ؟؟ لان مافي رجال بالبلدية …!! او عطيني لاعطيك .. او خود وعطيني معك .. خلصنا بقى خلصنا ..شي مقززز ومقرف .
البلدية كلها بدها نفض .. بشريا واداريا .. بيجيلك واحد شرشوح عندو واسطة بيعمل دزة على شغلة سخيفة كتير …بتركض البلدية ..بينما الاساسيات والواجبات متروكة على الله .. !!!
وبدي الفت انتباهكم لشي مهم كتير .. عدد من الناس ما بيعرفو الفرق بين انتخاب المختار وبين انتخاب عضو مجلس بلدية .. المختار كل واحد بينتخب حسب منطقتو ..مثلا اذا انت من الاشرفية بنتخب مختار عن الاشرفية ..المزرعة عن المزرعة .
اما انتخاب عضو مجلس بلدية بيروت .. فهي لكل مناطق بيروت ..مجرد انت من بيروت بتنتخب اي عضو مرشح عن بلدية بيروت ..بغض النظر انت من الاشرفية الرميل عين المريسة المزرعة البسطة المصيطبة راس بيروت وغيرهم …كلها انتخابات واحدة .. فقط للتوضيح ..
وبدي اذكر شي مهم بعد. لما كنا اصغر بالعمر اول بداية مشاركتنا انو ننتخب .. كان يقول والدي رحمه الله ..ان الانتخاب واجب وطني .. وعندما نتناقش معه انو كلهم تقريبا فاسدين او سيئين ..كان يقول لنا .. لازم نختار الاقل سوءا من المرشحين .. حتى ما يوصل الاكثر سوءا .. هيك كانت نظرته رحمه الله .
بدي اشكر المهتمين بترشحي على الانتخاب وكل مين عم بيشارك منشوراتي وكل مين عم يعلق ويتفاعل مع منشوراتي. لان التفاعل عليهم بكل مرة يرفع المنشور ليصل الى اكبر عدد .. يعني ما تتعبو 😻.. وبدي اشكر كتير كمان يلي عندهم النية الفعلية لانتخابي .. ❤❤
بدنا دعم الاوادم .. بعرف صارت نسبتهم قليلة .. بس هيدا يلي منعول عليه .
رلى توفيق راشد الحوري
صوت الذين لا صوت لهم
مرشحة لعضوية بلدية بيروت
