تخيلوا إن بنت الشيخ الحصري اللي صوته بيهز المآذن، قررت في لحظة تقف قدامه وتختار طريق الغناء.. ياسمين الخيام، أو ”إفراج” زي ما أبوها سماها، اتحولت من بنت الشيخ الحصري لخليفة أم كلثوم.. يا تري إيه السر اللي قلب حياتها 180 درجة وخلاها تسيب المجد والشهرة في ليلة وضحاها؟
الحكاية بدأت من بيت كله قرآن وورع، الشيخ محمود خليل الحصري كان حلم حياته بنته تمشي على نهجه، وفعلاً اشترط عليها الجواز قبل الجامعة عشان يطمن عليها، واتجوزت “فؤاد بك” اللي كان شغال في رئاسة الجمهورية، ومن هنا بدأت الكواليس تتغير.
ياسمين كانت بتشتغل في قسم المراسم بمجلس الأمة، وفي يوم الصدفة لعبت دورها.. زوجة شاه إيران كانت في زيارة لمصر ومعاها السيدة جيهان السادات، وبمجرد ما سمعت صوت ياسمين وهي بترحب بيهم، انبهرت وقالت لجيهان السادات: البنت دي صوتها كنز.
الموضوع وصل للرئيس السادات اللي كان بيعشق صوت الشيخ الحصري، وطلب يسمع بنته بنفسه، وبمجرد ما غنت قدامه، انبهر وقال إن مصر لقت خليفة أم كلثوم، وكلف الملحن الكبير محمد عبد الوهاب ورياض السنباطي إنهم يتبنوها فنياً.
لكن الصدمة بقا كانت عند الشيخ الحصري
الحصري رفض تماماً احتراف بنته للغناء، لدرجة إن يقال إنه قاطعها فترة، لكن ياسمين قدرت تقنع الوسط الديني وقتها بإنها هتقدم فن راقي وأناشيد دينية ووطنية بس، وبالفعل غنت “أمتك يا محمد” و”محمد يا رسول الله” وبقت أيقونة في التليفزيون المصري.
ونيجي بقا للمفاجأة اللي ناس كتير ميعرفوهاش
لا
ياسمين الخيام مكنتش مجرد مطربة، دي كانت بتدرس علم النفس في الجامعة، وده خلاها شخصية متزنة جداً حتى وهي في قمة شهرتها، وفضلت 10 سنين هي الصوت النسائي الأول في المناسبات الرسمية للدولة.
نقطة التحول في حياتها كانت سنة 1990، وبعد رحيل والدها بـ 10 سنين، وفي عز مجدها، ياسمين الخيام قررت تعتزل فجأة والسبب.. رؤية شافتها في المنام وكلمات والدها اللي كانت دايماً في ودنها.
قررت ترتدي الحجاب، وراحت شطبت اسمها الفني من النقابة، وقررت تكرس حياتها لخدمة وصية أبوها.
ياسمين الخيام النهارده مش مجرد فنانة معتزلة، دي بتدير إمبراطورية خيرية.. هي اللي أشرفت على بناء مسجد الحصري في 6 أكتوبر اللي بقى منارة دينية، وفتحت مجمع طبي وجمعية كفالة أيتام، وقدرت تحول ثلث ثروة والدها لأكبر مشروع خيري بيخدم آلاف المساكين.
ياسمين الخيام أثبتت إن الصوت الحلو ممكن يغني للدنيا، وممكن كمان يسبح لرب السما، وفي الأخر اختارت إنها تكون بنت الحصري اللي بجد، وبتنفذ وصيته بالحرف.
