نتنياهو امبارح كشف قدام كاميرات الإعلام إنه عايز يحتل فلسطين كلها، وكمان ياخد أراضي من مصر والأردن وسوريا والسعودية!
وكل ده في سبيل إقامة دولة “إسرائيل الكبرى”، اللي المفروض في عقيدتهم هتكون قائدة المنطقة كلها قبل قدوم المسيح المنتظر، وحرب نهاية الزمان!
لو انت متابعتش اللي حصل امبارح، فخليني أقولك ان نتنياهو كان في مقابلة حصرية مع قناة i24 الإسرائيلية… وخلال اللقاء ده اتقالت حاجات وتصريحات من أخطر ما يكون…
خليني بقى أحكيلك عليها وأشرحلك الموضوع من بدايته، عشان تفهم أبعاد القصة الحقيقية جت منين ورايحة على فين… 👇
شوف يا سيدي… أثناء اللقاء، المذيع شارون جال (اللي هو كان عضو كنيست يميني سابق) قدم لنتنياهو فجأة في وسط الكلام تميمة أو سلسلة كده صغيرة، معمولة على شكل سلسلة بتمثل خريطة “الأرض الموعودة” حسب المعتقدات الصهيونية..
والخريطة دي كان باين فيها انها بتضم جواها كامل أرض فلسطين التاريخية، ومعاها أجزاء من السعودية والأردن وسوريا، ونص مساحة مصر الشرقية تقريبًا من أول سيناء ولحد النيل…
وبعد ما المذيع إدالة التميمة، سأله سؤال غريب… “هل أنت مرتبط برؤية إسرائيل الكبرى دي؟”
رد نتنياهو بقى مكانش دبلوماسي ولا حاول يلف ويدور كتير… وقاله بكل وضوح: “أيوه… مرتبط جدًا”… وكمان أضاف بعدها: “أنا شايف نفسي في مهمة أجيال… في أجيال من اليهود حلمت بالمجيء إلى هنا وأجيال تانية لسه هتيجي بعدنا. لو بتسألني إذا كان عندي إحساس بالمهمة دي تاريخيًا وروحيًا، فالإجابة هي أيوه.”
طبعًا زي ما انت متخيل، الكلام ده معداش بالساهل كده، وأثار جدل وقلبان في الصحافة الإسرائيلية والعربية كلها، والسوشيال ميديا كلها من امبارح بتتكلم عنه… وده عشان المرة دي تصريحات نتنياهو مكانتش مجرد كلام…
دي تعتبر إعلان صريح لأول مرة قدام كاميرات الإعلام وبشكل معلن؛ عن مشروع توسعي بيتجاوز حدود فلسطين التاريخية…
يعني اللي بيحصل في غزة دلوقتي ده هو مش مجرد رد من الاحتلال على أحداث 7 أكتوبر… لأ خالص… ده جزء من حرب دينية تلمودية بتهدف لفرض يهودية المنطقة وتغيير هويتها بالكامل….
والحرب على غزة اللي مستمرة من أكتوبر 2023 ولحد النهارده ماهي إلا الخطوة الأولى في المشروع ده… وكل اللي بيحصل في القطاع من تدمير كامل للبنية التحتية وتهجير للسكان، هو تجربة مصغرة لـ اللي الكيان الصهيوني عايز يطبقه على باقي المنطقة!
بس القصة الحقيقية ورا فلسفة نتنياهو وخططه اللي عايز ينفذها في المنطقة، هي في الواقع قصة مخيفة ومُقبضة ومش كل الناس تعرفها… ومبدأتش مع التصريحات دي… بل هي بدأت زمان جدًا، من حوالي 40 سنة تقريبًا…
في الوقت ده، نتنياهو مكانش لسه بقى رئيس وزاء اسرائيل… بل كان شغال نائب في السفارة الإسرائيلية في واشنطن، وبعدها بشوية أصبح مندوب دائم في الأمم المتحدة، واللي معظم اليهود المتشددين وقتها كانوا بيسموها “بيت الظلام والأكاذيب”، وشايفين إن في عداء شديد بيواجههم هناك…
وعشان كده، ف لما نتنياهو دخل الأمم المتحدة أخيرًا، وأصبح مندوب اسرائيل الدائم هناك، الإنجاز ده خلاه يتأهل لمقابلة غيرت حياته للأبد…
المقابلة دي جمعت ما بينه وبين واحد من أهم الشخصيات في التاريخ اليهودي، اللي هو الحاخام “مناحيم شنيرسون”، زعيم حركة “حباد لوبافيتش” اليهودية الحسيدية في بروكلين، واللي بيسموه بلقب “الريبي Rebbi”…
بس عشان تفهم مين هو الشخص ده بالظبط، لازم الأول تفهم هي أيه منظمة حباد لوبافيتش دي أصلًا…
“حباد” دي هي حركة يهودية أرثوذكسية حسيدية، أسسها حاخام اسمه “شنيور زلمان” في القرن الـ18 في روسيا البيضاء، اللي هي (بيلاروسيا)… ومقرها الرئيسي موجود في الولايات المتحدة الأميركية، وحاليًا ليها أتباع بعشرات الآلاف حوالين العالم…
طيب بتعمل أيه بقى الحركة دي؟
الهدف الرئيسي لحركة “حباد” حسب كلامهم، هو انهم بيسعوا لإحياء المفاهيم اليهودية في نفوس أتباعهم، وتقريب اليهود غير المتدينين من عقيدتهم، وكمان عايزين يزرعوا جواهم شعور “التفاني والمحبة تجاه الآخرين”…
ده طبعًا اللي هما بيقولوه للناس… لكن الحقيقة غير كده خالص…
الحقيقة هتلاقيها في كتاب “هتانيا” اللي ألفه “زلمان” مؤسس الحركة في القرن الـ 18… الكتاب ده موجود فيه أساس التعاليم اللي بتؤمن بيها الحركة، واللي هي قايمة في أساسها على دراسة نصوص القبّالة، اللي هي نوع من سحر (التصوف اليهودي)… وتعاليم الهتانيا دي بتقول عن الشعوب الأخرى غير اليهود وخصوصًا العرب؛ آراء صادمة…
الآراء التي بتروج ليها حركة الحباد هي رفض فكرة “الأرض مقابل السلام”، وكمان بتدعو لترحيل العرب من أرضهم وقتلهم بشكل مباشر كده وش… وحسب تعاليم الكتاب، فـ كل من هم غير يهود هما: “مخلوقات شيطانية مفيش جواها أي شيء كويس أو خير على الإطلاق”… وكمان الكتاب ده بينص على ان اليهود المفروض “يخرجوا من بلاد الأغيار المدنّسة، ويستوطنوا في أرض فلسطين المقدّسة”…
وعايزك تركز ان كل ده مكتوب في القرن الـ 18.. يعني مشروعهم الاستيطاني أقدم من ما انت متصور…
أهو تخيل بقى ان الحاخام اللي قابله نتنياهو في بروكلين، اللي هو “مناحيم شنيرسون”، ده يعتبر تاني أهم حاخام في تاريخ الحركة دي بعد مؤسسها، ويمكن بيعتبروه حتى أهم من مؤسسها نفسه… ومن ساعة ما مات في يونيو من سنة 1994 ولحد النهارده؛ مفيش ليهم أي قائد روحي غيره…
وده عشان هما شايفين ان الراجل ده هو نفسه المسيح المنتظر وانه هيرجع من الموت قريب عشان يقودهم مرة تانية… يعني الراجل ده بالنسبالهم كان أكبر من مجرد قائد.. ده كان أقرب لنبي، وكانوا بيقدسوه…
ف تخيل لما نتنياهو يقابل النبي بتاعهم وجهًا لوجه كده، ويقوله الكلام اللي هقولهولك ده…
الحاخام لما شاف نتنياهو وقابله لأول مرة، كلفه بمهمة سامية ومقدسة… المهمة دي هي تهيئة إسرائيل لاستقبال “الماشيحا”… اللي هو في عقيدة اليهود المفروض انه المسيح المخلّص اللي هييجي في آخر الزمان عشان يقود الشعب اليهودي ويخلص العالم من الشرور…
وعشان يحقق المهمة دي، طلب منه انه يعمل (حاجة كبيرة) عشان يمهد الأمور للمجيء المقدس، من خلال إنه يرجع إسرائيل تاني مملكة كبرى، ويرجع ناسها تاني متدينين متشددين، عشان الأمور تبقى متمهدة بأفضل شكل ممكن للقدوم المنتظر…
ومش بس كده… ده قاله نصًا كده انه هينجح في مهمته دي، وانه هيبقى آخر رئيس وزراء لإسرائيل، أو “آخر ملوك إسرائيل” حسب تعبيره، قبل مجيء المسيح… وهسيبلك لينك مباشر للمقابلة دي تقدر تعرف عنها وتشوفها ف الكومنتات تحت 👇
نتنياهو بقى من ساعة ما اتقالتله النبوءة دي، وهو شايف نفسه فعلًا الملك الأخير لإسرائيل… وكل السياسات اللي هو بيعملها من ساعتها لحد النهارده، هي بهدف تحقيق النبوءة دي، وتنفيذ المهمة اللي تم تكلفه بيها…
ومن هنا بقى يبانلك ان تصريحات نتنياهو اللي اتقالت في البرنامج بتاع امبارح ده، مش مجرد كلام وخلاص… ولا هي مجرد تهويل أو أي هري بيداعب بيه أحلام التيار اليميني في حكومته…
لأ دي حقيقة فعلية وهو مؤمن بيها بشكل كامل، كجزء من عقيدته الدينية نفسها!
والأخطر كمان هو إن الحكومة الإسرائيلية الحالية هي الأكثر تطرفًا في تاريخ الكيان، وفيها وزراء زي سموتريتش وبن غفير اللي بيؤمنوا بنفس الأفكار دي، وكلهم بيتحركوا كأنهم في سباق مع الزمن لتنفيذ أكبر قدر ممكن من المخطط قبل ما يتغير الوضع السياسي المفروض حاليًا في المنطقة…
والمشكلة الأكبر هي إن أمريكا بتدعم المشروع ده بشكل كامل، عشان إسرائيل ما هي إلا قاعدة أمريكية غربية كبيرة، وولاية أمريكية تم زرعها في الشرق الأوسط عشان تكبح جماح التوسع العربي والطموحات الإسلامية وتسيطر على مقدراتها وثرواتها…
وهو ده بالضبط -بالإضافة للضعف العربي العام حاليًا- اللي خلى نتنياهو يتجرأ ويعلن عن حلمه التوسعي قدام العالم كله!
وعلى الناحية التانية… للأسف الدول العربية لحد دلوقتي مش واخدة الموضوع بجدية كافية، ومفيش رد فعل قوي على التصريحات دي، واللي المفروض انها بتهدد الأمن القومي لكل الدول العربية المحيطة…
نتنياهو حاليًا عايش في فيلم تاريخي شايف نفسه بطله، وشايف كل الحروب والدمار اللي هو بيعمله ده، هي خطوات على طريق تحقيق الحلم الكبير اللي وعده بيه “الريبي” من زمان…
إحنا دلوقتي في لحظة فارقة… يا إما العالم العربي يفوق ويدرك حجم الخطر اللي بيتهدده، يا إما للأسف هنشوف خريطة الشرق الأوسط كلها بتتغير قدام عنينا للأبد…
هسيبلك المصادر في أول كومنت كالعادة 👇 ولو وصلت لهنا، متنساش تشارك المقال مع الناس من خلال الشير، عشان الكل يعرف بداية القصة وأصل الموضوع جاي منين، والكل يعرف الخطر الحقيقي اللي بيهددنا كلنا، مش بس الفلسطينيين
