السباحة مش رياضة سهلة ومش لعبة أي حد يقدر يخشها ويكمل فيها السباحة لعبة حبالها طويلة جدًا وورا كل سباح ناجح سنين تعب وسنين تمرين وسنين نفس بيطلع وبيتشد من جسمك وبيترمي تاني في الميه وانت بتحاول تبقى أسرع وتبقى أقوى وتبقى أدق في كل حركة

في البداية الكل بيشوف الميه مجرد مكان للعب بس بعد أول تمرينين تلاتة بتكتشف إن الميه مش بس لعبة دي مدرسة قاسية جدًا بتعلملك الصبر والالتزام وبتخليك تراجع نفسك كل يوم بتصحى بدري قوي وبتنزل التمرين وانت جسمك مش قادر تكمل بس بتكمل

أوقات كتير بتقف على البلوك قلبك بيدق بسرعة ومخك بيقلك ارجع لكن في نفس اللحظة في صوت جواك بيقلك اقفز كمل اتعلم غلط عادي بس ارجع تاني وادي أفضل ما عندك لإن اللعبة دي مبتقبلش النص نص يا بتدي كل حاجة يا متجيش من الأول

السباحة بتعلمك يعني ايه تتحدى جسمك كل يوم يعني ايه تحط هدف مش بيتحقق بسرعة لكن بيتحقق بالاستمرار بالحفر كل يوم بنفس الطريقة وبنفس المجهود مع اختلاف بسيط بيبان على المدى الطويل

مش أي حد هيحب التكرار ومش أي حد هيحب الألم اللي بييجي من التمرين ولا العزل اللي بتحس بيه لما تكون كل حياتك عبارة عن مية ونوم وتمرين وأكل ومفيش وقت لحاجة تانية بس اللي فعلا بيكمل في السباحة بيعرف هو مين وبيعرف هو يقدر يوصل لإيه

السباحة مش بس رياضة دي رحلة طويلة مليانة لحظات فشل ولحظات شك ولحظات إحباط بس برضو فيها لحظات نادرة بتحس فيها إنك حر إنك طاير فوق الميه جسمك بيمشي بانسيابية وراسك فاضية تماما من أي صوت غير صوت نفسك اللي طالع وانت بتتحرك

اللعبة دي بتخليك تتعامل مع نفسك بصدق مفيش جمهور بيصقف وانت بتتمرن مفيش مدرب دايمًا راضي عنك ومفيش خصم غير نفسك مفيش سباح غيرك تقدر تقارنه بنفسك غير نسخة منك امبارح

التقدم فيها بيجي ببطء لكن لما ييجي بيغيرك بيخليك تفرح بحاجات صغيرة زي إنك قللت ثانية في زمنك أو إنك عرفت تتحكم في النفس أكتر أو إنك قدرت تكمل تمرين للنهاية من غير ما تستسلم

السباحة بتخليك تبقى شخص ملتزم بتخليك تفهم يعني إيه تفاصيل يعني إيه كل حاجة بسيطة بتفرق يعني إزاي وضع جسمك وإيدك ورجلك ونفسك لازم كلهم يشتغلوا كأنهم آلة واحدة

اللعبة دي صعبة جدًا اه لكن تستاهل كل لحظة تعب فيها لإنها في الآخر مش بتطلعك سباح بس بتطلعك بني آدم أقوى بني آدم عارف قيمة المجهود عارف قيمة الوقت عارف قيمة الفشل اللي بييجي قبل النجاح

الموضوع كله مش في إنك تبقى بطل على المنصة الموضوع في إنك تتحول من شخص بيخاف من الميه لشخص بيتعامل معاها كأنها وطن شخص بيرتاح وهو بيجري جواها

وده اللي بيخلي السباحة لعبة تستحق المغامرة لإنها رغم كل صعوبتها بتخليك دايمًا عايز تبقى أفضل وبتحفزك تبص على نفسك بعين أعلى وتقول أنا لسه ماوصلتش بس هستمر

الناس ممكن تشوفك بتتمرن ويفتكروها لعبة سهلة بس اللي بينزل الميه وبيتمرن يوم ورا يوم هو اللي فاهم حجم المعركة اللي جوه كل متر سباحة حجم الصراع اللي جوه النفس اللي بيعدي بين كل حركة والتانية

في الآخر السباحة مش للكل وده مش تقليل من حد لكن دي الحقيقة هي رياضة اللي يختارها لازم يكون عارف إنه هيخسر راحة كتير ووقت كتير بس في المقابل هيكسب شخصية أقوى بكتير من اللي بدأ بيها

السباحة لعبة صعبة فعلا لكنها تستاهل المغامرة والمجازفة والتضحية لأنها مش بس بتغير جسمك لأ دي بتغير فكرك ونظرتك للدنيا كلها